Arabako eskola publikoek hitzordu bikoitza izango dute ekaineko lehen asteburuan. Batetik, ekainaren 1ean Arabako Errioxako Eskola Publikoaren lehen jaia egingo dute. Hurrengo egunean, gainera, Ordizian izango dute bigarren hitzordua, bertan egingo baita aurtengo Euskal Eskola Publikoaren 31. jaia.
Egun hori gidatuko duen abestia eta bideoa aurkeztu ditu gaur EHIGE Euskal Herriko Ikasleen Gurasoen Elkarteak. Publikoa ai do da abestiaren leloa, eta Jon Maiak idatzitako letrak "metafora meteorologikoa" egin nahi izan duela azaldu du elkarteak. Kau Kori Kura taldeak ondu du musika.
